बद्री अर्याल

चितवनमा एक सातासम्म भेडाबाख्रालाई पिपिआर रोग विरुद्धको खोप लगाइने भएको छ । मंगलबारदेखि सुरु भएको खोप कार्यक्रम फागुन २ गतेसम्म हुनेछ । भेटेरीनरी अस्पताल तथा पशु सेवा विज्ञ केन्द्र चितवनका निमित्त प्रमुख डा. प्रभात न्यौपानेले भेडाबाख्राको हैजाका रुपमा लिइने पिपिआर रोग संक्रामक भएकाले खोप लगाउनुपर्ने बताउनुभयो । विज्ञ केन्द्र, पशु सेवा केन्द्र, स्थानीय तहका पशु सेवा शाखाबाट सम्पर्क गर्न अनुरोध गर्नुभयो । २० भन्दा बढी भेडाबाख्रा हुने किसानले जानकारी गराए खोरमै पुगेर खोप लगाइनेछ । यो खोप निःशुल्क लगाइने छ ।

पिपिआर खोरेत विरुद्धको भ्याक्सिनेसन कार्यक्रम फोकल पर्सन दिनेश ढकालका अनुसार ४४ वटा खोप केन्द्र निर्धारण गरिएको बताउनुभयो । भरतपुर महानगरका पशु सेवाकेन्द्रमा राखिएका ८ खोप केन्द्रहरुमा जुगेडी, लंकु, मंगलपुर, गुञ्जानगर, शारदानगर, मेघौली, पटिहानी, गीतानगरमा खोप केन्द्रहरु छन् । यस्तै रत्ननगरका ३ खोप केन्द्रहरुमा पिठुवा, जमुनापुर र जिरौना छन् । कालिकाका ४ खोप केन्द्रहरुमा सिद्धि, शक्तिखोर, पदमपुर, खोलेसिमल छन् । खैरहनीका १२ खोप केन्द्रहरुमा ज्यामिरे, लदरी, गाठेघर, खैरहनी–५ को दुर्गामन्दिर, भुमही, पर्साबजार, कठार, कुमरोज, गबई छन् । राप्तीको ५ खोप केन्द्रहरुमा पिप्ले, परेवाकोट, गडौली, गुम्बाटोल र चौकिडाँडा छन् ।

इच्छाकामनाका ३ खोपकेन्द्रहरुमा फिसिलिङ, मुग्लिङ र काउले छन् । माडीका ९ वटै वडाहरुमा खोप केन्द्रहरु छन् । सप्ताहव्यापी अभियानमा महानगरमा ३० हजार, रत्ननगरमा २० हजार, कालिकामा १५ हजार, खैरहनीमा १५ हजार , राप्तीमा २० हजार, इच्छाकामनामा २० हजार, माडीमा १५ हजार भेडाबाख्रामा खोप लगाउने लक्ष्य लिइएको छ । फोकल पर्सन ढकालका अनुसार चितवनमा १ लाख २७ हजार पिपिआर विरुद्धको खोप अभियान अन्र्तगत लगाइने छ । गत वर्ष चितवनमा ७० हजार भेडाबाख्रामा खोप लगाइएको थियो । खोप अभियानमा ३८ जना भ्याक्सिनेटेरहरु खटिने छन् । उनीहरुलाई आज अभिमुखिकरण तालिम दिइएको छ । गत वर्ष ३ पटक पिपिआर रोगको संक्रमण फैलिदा करिब १२ सय भेडाबाख्रामा क्षती पुगेको थियो । एक चोटी खोप लगाएपछि ३ वषपछि अको खोप लगाउनुपर्छ ।